ನಾನೊಂದು ಮುದಿ ಜೀವ ಎಲ್ಲರಿದ್ದು ಎಲ್ಲವಿದ್ದು ನಾನಿಂದು ಇಲ್ಲಿರುವೆ
ಇಲ್ಲಿರುವವರಲ್ಲಿ ಎನ್ನ ಮಗನನ್ನು ಹುಡುಕುತ್ತಿರುವೆ
ಆದರೆ ಎನ್ನೆದೆಯ ನೋವು ಮರೆಯಲು ಸಾಧ್ಯವೇ?
ನೀನಂದು ಎಳೆಯ ಮಗು
ಎನ್ನೆದೆಗೆ ಒದ್ದಾಗ ಪುಳಕಗೊಂಡೆ
ಪುಟ್ಟ ಹೆಜ್ಜೆಯಿಟ್ಟು ಎಡವಿದಾಗ
ನಾ ನಿನಗೆ ಊರುಗೋಲಾದೆ
ನಿನ್ನ ಆ ಮುಗ್ಧ ನಗು
ಮರೆಸುತ್ತಿತ್ತು ನನ್ನೆಲ್ಲಾ ದುಃಖ
ಆದರೆ, ನೀನಿಂದು
ಯಾಕೆ ಹೀಗಾದೆ?
ನಿನಗೆ ಕೊಡಿಸಿದ ವಿದ್ಯೆ,ಹಣ
ನಿನ್ನನೀ ರೀತಿ ಮಾಡಿಸುತಿದೆಯೇ ?
ನಾನಿಂದು ನಿನಗೆ ಬೇಡವಾದೆನೆ ?
ನಿನಗೆ ಈ ಜೀವ ಭಾರವಾಯಿತೇ ?
ಎನಗೆ ನೀಡುವ ತುತ್ತು
ಈ ಆಶ್ರಮಕ್ಕೆ ನೀಡುವ ಹಣಕ್ಕಿಂತ ಹೆಚ್ಚೇ?ನದಿ ದಾಟಿದ ಮೇಲೆ ಅಂಬಿಗನ ನೆನಪೆಲ್ಲಿ
ಎಂಬ ಮಾತು ನನ್ನ ಬಾಳಲ್ಲಿ ನಿಜವೇ?
