ಬಾಲ್ಯದ ದಿನಗಳಲ್ಲಿ ನನ್ನ ನೆಚ್ಚಿನ ಸಂಗಾತಿಯೆಂದರೆ ಬಾಲಮಂಗಳ . ಈಗ ನಾನು ಯಾವ ರೀತಿ ಮೊಬೈಲಿಗೆ ಅಂಟಿಕೊಂಡಿರುತೇನೋ ಅದೇ ರೀತಿ ಬಾಲಮಂಗಳಕ್ಕೆ ಅಂಟಿಕೊಂಡಿರುತಿದ್ದೆ . ಅದರಲ್ಲಿ ಬರುವ ಕಥೆಗಳನ್ನು ಓದುತ್ತ ಕುಳಿತರೆ ಊಟ ನಿದ್ದೆಯನ್ನು ಮರೆಯುತ್ತಿದ್ದೆ .ನನ್ನ ಮನೆಗೆ ಬಾಲಮಂಗಳ ತರುತ್ತಿರಲ್ಲಿಲ್ಲ ಆದರೆ ನನ್ನ ಚಿಕ್ಕಪ್ಪನ ನೆರೆ ಮನೆಗೆ ತರುತಿದ್ದರು . ಬಾಲಮಂಗಳ ಓದುವ ಆಸೆಗೆ ನಾ ಚಿಕ್ಕಪ್ಪನ ಮನೆಗೆ ಹೋಗುತ್ತಿದ್ದೆ. ಎಲ್ಲ ಹಳೆಯ ಹೊಸ ಸಂಚಿಕೆಗಳನ್ನು ಒಟ್ಟಿಗೆ ಓದುತ್ತಿದ್ದೆ .
ಕೆಲವೊಂದು ಸಂಚಿಕೆಗಳನ್ನು ನನ್ನ ಮನೆಗೆ ಎತ್ತಿಕೊಂಡು ಬಂದು ಪಾಠ ಪುಸ್ತಕದ ನಡುವೆ ಇಟ್ಟು ಓದಿ ಅಪ್ಪನೆದುರು ಪಾಠ ಓದುವಂತೆ ನಟಿಸುತ್ತಿದ್ದೆ .
ಬಾಲಮಂಗಳದೊಂದಿಗೆ ,ಬಾಲಮಂಗಳ ಚಿತ್ರಕಥೆಯೂ ನನ್ನ ಪ್ರೀತಿಯ ಪುಸ್ತಕ. ಒಂದು ದಿನ ತರಗತಿಯಲ್ಲಿ ಬಾಲಮಂಗಳ ಓದಿ, ಟೀಚರ್ ಕೈಗೆ ಸಿಕ್ಕಿ ಹೊಡೆತವನ್ನು ತಿಂದಿದ್ದೆ . ನಾನಿಂದು ಪುಸ್ತಕ ಓದುವ ಹವ್ಯಾಸವನ್ನು ಬೆಳೆಸಿಕೊಳ್ಳಲು ಒಂದು ರೀತಿಯಲ್ಲಿ ಬಾಲಮಂಗಳ ಕಾರಣ .
ಬಾಲಮಂಗಳದಲ್ಲಿ ಬರುತ್ತಿದ್ದ ಡಿಂಗ ಮತ್ತು ಶಕ್ತಿ ಮದ್ದು ನನ್ನ ಪ್ರೀತಿಯ ಕಥೆಗಳು . ನಾನು ಅಣ್ಣ ತಂಟೆ ಮಾಡಿಕೊಂಡು ಅಣ್ಣ ಹೊಡೆದಾಗ ನಾನು ಜೋರಾಗಿ "ಡಿಂಗ ಕಾಪಾಡು"ಎಂದು ಕಿರುಚುತಿದ್ದೆ. ಡಿಂಗ ಬರುತ್ತಿರಲಿಲ್ಲ ಆದರೆ ಅಮ್ಮ ಬಂದು ನನಗು ಅಣ್ಣನಿಗೂ ಬೆತ್ತದ ರುಚಿ ತೋರಿಸುತ್ತಿದ್ದರು.
ಈಗ ನನಗೆ ಬಾಲಮಂಗಳದ ಬೆಲೆ ಗೊತ್ತಿಲ್ಲ, ಆಗ ನಾನು ನಾಲ್ಕು ,ಐದು ರೂಪಾಯಿಗೆ ಬಾಲಮಂಗಳ ಸಿಗುತ್ತಿತ್ತು. ಇಂದಿನ ಎಷ್ಟು ಜನ ಮಕ್ಕಳು ಬಾಲಮಂಗಳ ಓದುತ್ತಾರೆಂದು ತಿಳಿದಿಲ್ಲ ,ಬಾಲಮಂಗಳದ ಜಾಗವನ್ನು ಕಾರ್ಟೂನ್ ನೆಟ್ವರ್ಕ್ ,ಪೋಗೊ ಮುಂತಾದ ಚಾನೆಲ್ ಗಳು ನಿಧಾನವಾಗಿ ಆಕ್ರಮಿಸಿಕೊಂಡಿವೆ .
ಅದೇನೆ ಆಗಿರಲಿ ಬಾಲಮಂಗಳ ನನ್ನ ಸಮಕಾಲೀನ ಗೆಳೆಯ ಗೆಳತಿಯರಿಗೆ ಪ್ರೀತಿಯ ಪುಸ್ತಕವಾಗಿತ್ತು ಎಂಬುದರಲ್ಲಿ ಸಂಶಯವಿಲ್ಲ . ನೀವು ಬಾಲಮಂಗಳ ಡಿಂಗ ,ಲಂಬೋದರನ ಅಭಿಮಾನಿಗಳಾಗಿದ್ದರೆ ಅಭಿಪ್ರಾಯ ತಿಳಿಸಿ .
